По одличниот резултат на првиот натпревар од 1/16-финалето во Лигата на Европа против турски Бешикташ, македонскиот репрезентативец Горан Попов со својот Динамо Киев веќе сигурно размислува за патот во 1/8-финална рунда на европската сцена.
Украинците во Истанбул убедливо го совладаа Бешикташ со 4:1. Попов ги одигра последните 17 минути на натпреварот на кој зад неговото име остана забележан и обидот од слободен удар од околу 30 метри во 85. минута од натпреварот кој заврши покрај дирекот од голот на Турците.
"Онака како и што очекувавме имаме далеку поквалитетен тим од Бешикташ. Уште на првиот меѓусебен натпревар ја потврдивме моќта. Сигурно без опуштање, во ист ритам, планираме одигрување и на реванш средбата и без сомнение место меѓу 16-те најдобри екипи во Лигата на Европа", вели Попов.