Екипите на Реал Мадрид и Челзи синоќа последни изборија пласман меѓу осумте најдобри екипи од Лигата на шампионите.
Во Мадрид, Реал му се одмазди на францускиот Олимпик Лион за претходните елиминации и со победата од 3:0 во реваншот (со вкупни 4:1) избори четвртфинале прво по седум години.
Головите за „кралскиот клуб“ ги постигнаа Марсело во 37.минута, Карим Бензема во 66.минута и Анхел Ди Мариа во 76.минута.
На вториот натпревар синоќа во Лондон на „Стенфорд бриџ“ Челзи и Копенхаген одиграа без голови 0:0 и благодарение на победата на Челзи на првиот натпревар од 2:0, англискиот тим обезбеди пласман во четвртфиналето.
Извлекувањето на двојките за четвртфиналето ќе се одржи утре во Нион во седиштето на УЕФА во 12 часот, а во „шеширот“ ќе бидат екипите на: Барселона и Реал Мадрид (Шпанија), Манчестер Јунајтед, Тотенхем и Челзи (Англија), Интер – европски шампион (Италија), Шалке 04 (Германија) и Шахтјор (Украина). Финалето ќе се одигра на Вембли во Лондон на 28 мај.