Најдобриот македонски фудбалер Горан Пандев и неговиот Интер ги очекува повеќе од невозможна мисија во обидот вечерва на реванш средбата од 1/4-финалето во Лигата на шампионите против Шалке 04 да стигнат до уште една сензација и пласман меѓу најдобрите четири екипи во најквалитетното европско клупско натпреварување.
Лесно може да се случи одбраната на минатогодишната титула за "нероазурите" вечерва да заврши во Гелзенкирхен со оглед на огромната предност од 5:2 која Шалке 04 ја има од првиот натпревар одигран пред една недела во Милано. Малку кој верува дека четата на бразилскиот менаџер Леонардо може да стигне до уште една елиминација на германска екипа по онаа претходната на Баерн Минхен, посебно во ситуација кога Интер треба да брка негатива од три гола.
Според најавите во италијанските медиуми, македонскиот репрезентативец повторно, како и на последните две средби на Интер, од клупата ќе ја очекува својата шанса за настап на средбата. Леонардо најавува тактичка формација 4-3-1-2 со Самуел Ето и Диего Милито во нападот, и Весли Снајдер веднаш за напаѓачката двојка, и покрај ставовите на италијанската фудбалска јавност дека Пандев мора да добие место во стартната постава посебно ако се знае неговата одлучувачка улога при претходната елиминација на Баерн Минхен.