Интер не е истиот од лани, а и Леонардо не е Мурињо. Тимот од Италија има очајна пролет во која губи се што лани беше освоено. Завчера, во Гелзенкирхен беше потврдена елиминацијата во Лигата на шампионите. Трофеј со кој е загубен, а со истиот по автоматизам се губи и шансата за одбрана на светската круна. А кога сме кај дуелот во Германија вреди да се напомене дека Леонардо повторно згреши со Пандев. Македонецот повторно од клупата чекаше шанса, а откако на полувремето беше уфрлен во игра гостите од Милано станаа поопасни. Но гостувањето во Гелзенкирхен беше невозможна мисија за европскиот првак кој имаше страшна негатива од 2:5 по првиот меч на кој го немаше Пандев.
До крајот на сезоната Интер, најверојатно, ќе го загуби и приматот најдобар тим во Италија, а единствени реални шанси има да го "грабне" Купот на Италија каде игра 1/2 финале со Рома.
Ако лани за неколку месеци Интер освои 5 титули сега за исто толку време ги загуби сите. Елиминацијата од Шалке 04 е тежок дебакл за "нероазурите" во чии редови на лето се подготвува голема реконструкција, а Морати првата шут карта сигурно ќе му ја подели на славниот стратег Леонардо.