Тренерот на Челзи, Карло Анчелоти, на крајот на оваа сезона, најверојатно,ќе го напушти кормилото на тимот од Лондон, но нема потреба да се грижи за својата следна задача. Тој веќе се наоѓа на краткиот список на тренери кои би можеле да се преселат во Реал Мадрид доколку Мурињо си замине од Бернабе на крајот на јуни.
"Откако Мурињо призна дека има недовршена работа во Англија расте грижата кај раководството на тимот од 'Бернабе'. Воедно ова е дополнето со лошиот однос на Мурињо кон локалните новинари, па затоа се бара брзо решение за тренерската позиција", се вели во мадридските медиуми.
Сепак, ова може да не биде така лесно бидејќи за италијанскиот стручњак постои заинтересираност и од таборот на Рома. И во овој тим сакаат да го видат Анчелоти на клупата, па можно е Реал да мора да бара друго решение.
И додека Реал Мадрид бара решение за тренерската позиција во уште еден стручњак кој бил (се уште е тренер) во Челзи, Роман Абрамович ја 'потресе' каталонската јавност дека ова лето на Стемфорд Бриџ ќе пристигне Пеп Гвардиола.
Според Абрамович, Гвардиола е главен кандидат за тренерската позиција. Иако Пеп го продолжи договорот, Роман нема да штеди за да го види во својот тим особено по слабата сезона во која се загубија сите борби и не се дојде до ниту еден трофеј. Трпението кон Анчелоти е пред крај и прашање на време е кога ќе мора да го напушти тимот.