Новата победа на Манчестер Јунајтед против Шалке 04 му донесе пласман во финалето од Лигата на шампионите, па на 28 мај на Вембли, Англија ќе има свој претставник. Шалке 04 не успеа да направи изненадување, а претрпе катастрофа откако домашните беа безмилосни и постигнаа дури четири гола.
Манчестер тргна поофанзивно на стартот од средбата. Домаќинот беше решен уште во првиот дел од мечот да го потврди својот пласман во финалето од Лигата на шампионите, каде што ден претходно беше пласиран и составот на Барселона.
Како што одминуваше времето притисокот стануваше се поголем, па грешките стануваат се позачестени во тимот на Шалке 04. Една таква грешка на средина од теренот му овозможи на тимот на Манчестер да дојде до шанса за прв погодок на средбата.
Дарон Гибсон успеа од далечина да го проигра Валенсија кој беше доволно брз за да може да се најде пред своите чувари и без поголеми проблеми да бие во голот на Нојер кој беше немоќен за да го спречи ударот. Ова се случи во 26 минута, а само пет минути подоцна стана јасно дека отпорот на гостинот е целосно скршен.
Асистентот на првиот погодок, Гибсон одлучи самиот да ја реши ситуацијата. Биеше од 15 метри, а голманот Нојер за сето она што го направи одлично на првиот меч сега се посрами. По негова грешка топката заврши зад неговиот грб, па Манчестер веќе имаше водство од 2:0, а со тоа и предност од 4:0 во севкупниот дуел.
Шокот на гостинскиот состав траеше кратко бидејќи фудбалерите на Шалке брзо успеаја да се вратат во игра. После една одлична акција, Хурадо за момент остана сам на нешто повеќе од десет метри од голот на Ван Дер Сар. Беше доволно брз за да може да бие во противничкиот гол, па на тој начин го намали водството на домашните на 2:1.
И покрај сето ова уште претходно беше јасно дека Манчестер е во финалето, па во продолжението се чекаше само на формална потврда на вториот финалист.
Второто полувреме навидум беше мирно и немаше некои посериозни акции коишто навестуваа гол. Таква беше и онаа во 72 минута кога Андерсон постигна одличен гол. Успеа да се снајде најдобро и откако прво се сврте биеше во голот на Нојер кој не успеа да интервенира. Андерсон го постигна и четвртиот гол за Манчестер четири минути подоцна и ја потврди катастрофата на Шалке 04.