Фудбалската репрезентација на Македонија е вклучена во петтата група за ждрепка за европскиот дел од квалификациите за пласман на Светското првенство во 2014 година, што ќе се одржи во Бразил.
Македонија е во истиот барабан со фудбалските репрезентации на Австрија, Азербејџан, Велс, Естонија, Кипар, Летонија, Молдавија и Финска, што значи дека нема да може да биде во иста квалификациска група со некоја од овие селекции.
Како што соопшти синоќа Унијата на европските фудбалски асоцијации (УЕФА) во првиот барабан ќе бидат репрезентациите на Англија, Германија, Грција, Италија, Норвешка, Португалија, Холандија, Хрватска и Шпанија.
Ждрепката за одредување на квалификациските групи ќе се одржи на 30 јули.
Согласно квалификацискиот распоред, директен пласман на Мундијалот во Бразил обезбедуваат првопласираните репрезентации во секоја од деветте квалификациски групи и најдобрата второпласирана селекција, додека останатите четири европски места ќе ги пополнат осумте преостанати второпласирани репрезентации по одиграните бараж натпревари.
Групи за ждрепка за европските квалификации за Светското фудбалско првенство во Бразил во 2014 година:
1. Англија, Германија, Грција, Италија, Норвешка, Португалија, Холандија, Хрватска и Шпанија.
2. Данска, Русија, Словачка, Словенија, Србија, Франција, Црна Гора, Швајцарија и Шведска.
3. Белгија, Босна и Херцеговина, Бугарија, Израел, Ирска, Турција, Унгарија и Чешка.
4. Албанија, Белорусија, Грузија, Ерменија, Литванија, Полска, Северна Ирска, Унгарија и Шкотска.
5. Австрија, Азербејџан, Велс, Естонија, Кипар, Летонија, Македонија, Молдавија и Финска.
6. Андора, Исланд, Казахстан, Лихтенштајн, Луксембург, Малта, Сан Марино и Фарски Острови.