Фудбалерите на Шкендија се поразени во својот прв настап во еврокуповите. Тие синоќа во Белград во рамките на второто квалификациско коло од Лигата на шампионите загубија од српскиот претставник Партизан со убедливи 4:0.
Првото полувреме заврши нерешено 0:0, иако гостите од Тетово ја имаа најубавата шанса први да постигнат гол, но пеналот на Ферхан Хасани во 12.минута го одбрани домашниот голман Владимир Стојковиќ.
Во второто полувреме Партизан доминираше. По само три минути игра (48.минута) „црно-белите“ дојдоа во водство со голот на Звонимир Вукиќ. Десет минути подоцна бразилскиот интернационалец Едуардо зголеми на 2:0. Седат Бериша со автоголот во 76.минута му донесе предност на српскиот шампион од 3:0. Конечните 4:0 ги постави Марко Шчеповиќ во 87.минута.
Реванш натпреварот ќе се одигра во вторник на 19 јули во Скопје.
На другите 10 натпревари одиграни вчеравечер постигнати се следниве резултати Зестафони - Дачија 3:0, Макаби Хаифа - Борац 5:1, Малме - Торшван 2:0, Бангор Сити - ХЈК 0:3, Скендербеу - АПОЕЛ 0:2, Динамо Загреб - Нефчи 3:0, Штурм - Видеотон 2:0, Сконто Рига - Висла 0:1, Розенборг - Брејдаблик 5:0 и Линфилд - Бате Борисов 1:1.
Во вторникот беа одиграни првите шест дуели од оваа фаза во квалификациите за ЛШ: Пјуник - Викторија Плзен 0:4 Валета - Екранас 2:3, Могрен - Литекс 1:2, Марибор - Дуделанж 2:0, Слован Братислава - Тобол 2:0 и Шамрок Роверс - Флора 1:0.
Реваншите се на 19 и 20 јули.