Повеќекратниот италијански шампион Интер денеска го отпушти тренерот Џан Пјеро Гасперини. Оваа одлука, според раководството на клубот е последица на лошиот резултатски почеток сезонава на тимот кој има големи амбиции во Серија А и во Лигата на шампионите.
Интер предводен од 53-годишниот Гасперини на три одиграни натпревари во Италијанското фудбалско првенство има два порази и еден нерешен резултат, а загуби на мечот од Лигата на шампионите што во 1.коло го играше на домашен терен против Трабзон и во Супер Купот против Милан.
Денешниот тренинг го водеа членовите на стручниот штаб Џузепе Барези и Даниеле Бернацани.
Од клубот најавија дека нов тренер ќе биде назначен до саботниот дуел што Интер треба до го одигра со Болоња на гостински терен. Како главни кандидати за наследник на Гасперини италијанските медиуми ги спомнуваат Клаудио Раниери Делио Роси, Валтер Ѕенга и Луис Фиго.