Управата на Фиорентина ја раскина соработката со тренерот Синиша Михајловиќ и на негово место го именува Делио Роси. "Виолетовите" беа поразени викендов од Киево, а челниците на клубот одлучија да му врачат отказ поради слабите резултати сезонава.
"Му благодариме на Михајловиќ за досегашната работа и му посакуваме се најдобро понатаму. Одлучивме да направиме промена бидејќи сметаме дека сега е вистинскиот момент за тоа", соопштуваат од клубот.
Српскиот тренер ја водеше Катанија пред две сезони од каде дојде во Фиорентина на местото на Чезаре Прандели, кој седна на клупата на репрезентацијата на Италија. Тимот од Фиренца моментално го држи 13 место во Серија "А", а Михајловиќ стана шестиот тренер во Калчото кој сезонава доби отказ.
Задачата да го рехабилитира тимот ја има екс-стратегот на Лацио и Палермо Делио Роси. Тој потпиша договор до летото 2013 година. Ќе дебитира во сабота против Милан.