Четирите бараж дуели за пласман на ЕУРО 2012 во Полска и во Украина се играат вечерва, а кои ќе бидат последните четири репрезентации кои ќе изборат пласман на Европското првенство во фудбал ќе биде познато на 15 ноември кога ќе се одиграат реванш натпреварите.
Во Зеница, Босна и Херцеговина ја пречекува Португалија и ќе се обиде да и се реваншира за елиминацијата во претходниот бараж за пласман на Светското првенство во Јужна Африка.
И во Истанбул ќе има натпревар за „наплата на стари долгови“. Хрватска најавува реванширање за елиминацијата од Турција во Виена на ЕУРО 2008 во четвртфиналето.
На другите два натпревара Чешка во Прага ја пречекува Црна Гора која е подготвена да ја продолжи серијата успешни резултати, додека Естонија во Талин е домаќин на Република Ирска, најголемиот фаворит за вкупна победа во овие натпревари.