Охрид, 11 ноември 2011 (МИА) - Селекторот на македонската фудбалска репрезентација Џон Тошак пред престојниот пријателски натпревар против селекцијата на Албанија изјави дека е разочарувачки што во дуелот нашата репрезентација ќе влезе без петмина важни играчи.
- Ни недостигаат петмина стандардни играчи – Пандев, Попов, Новески, Тричковски, како и Ибраими, за кој се надеваме дека би можел да ни се придружи в недела. Тоа е можеби шанса за други играчи, но разочарувачки е за мене што ги нема овие петмина важни играчи, што ја усложнува ситуацијата во нашите редови, рече Тошак пред новинарите во Охрид, каде македонските репрезентативци ги вршат последните подготовки за натпреварот во Прилеп.
Селекторот појасни дека поради отсуството на овие стандардни првотимци стратегијата за дуелот против Албанија ќе ја одреди дури в понеделник, откако ќе ја види формата на другите фудбалери, како и зависно од самиот тек на подготовките. За атмосферата во редовите на нашиот тим селекторот рече дека е задоволен, исто како и од текот на досега одржаните тренинзи.
- Не можам да се пожалам од работата на фудбалерите што се тука во Охрид, тие работат одлично, атмосферата е добра, но доколку и во иднина ни недостасуваат овие пет-шест стандардни играчи, тогаш ситуацијата станува уште посложена за македонската селекција, рече Тошак.
Најдобрите македонски фудбалери од вчера се на подготовки во Охрид. Тие денеска ќе одржат два тренинзи, и по еден тренинг утре и задутре, а за Прилеп заминуваат в понеделник попладне. Пријателскиот натпревар против селекцијата на Албанија ќе се игра во вторник на стадионот „Гоце Делчев“ со почеток од 13 часот.