Барселона е вториот финалист на Светското клупско првенство откако денеска со 4-0 го победи катарскиот тим Ал-Сад. Головите за каталонскиот тим ги постигнаа Адријано во 25-та и 43-та минута, Сеидоу Кеита во 63 и Максвел во 81-та. Ова беше пирова победа за Барселона бидејќи во 37-та минута тимот остана без Давид Виља.
Напаѓачот на Барса заработи скршеница на ногата и според првите процени ќе биде надвор од терените најмалку шест месеци, а големи се шансите да го пропушти и почетокот од Европското првенство во Полска и Украина следната година.
Барселона во финалето од Светското клупско првенство ќе се сретне со бразилскиот Сантош, а за третото место ќе се борат Ал- Сад и Кашива Рејсол од земјата домаќин. Финалето ќе се одигра на 18 декември во Јокохама.