55 милиони за нови играчиТренерот на Арсенал, Арсен Венгер, трпи големи критики од јавноста поради елиминациите од Лигата на шампионите и ФА Купот. Одамна се отпишани за премиерлигашката титула што за клубот значи седма сезона по ред без освоен трофеј во која било конкуренција. Сепак, челниците на Арсенал па и сопственикот Стен Кренке уверуваат дека Венгер не мора да се грижи за својата работа. Во текот на неделава ќе биде одржан состанок на кој ќе бидат анализирани резултатите на тимот сезонава, но и плановите за во иднина.
Се очекува на истиот на Венгер да му биде дадена поддршка, но и 55 милиони фунти за летниот преоден рок. Се што се очекува од Французинот е сезонава да ја заврши на некои од местата кои водат во Лигата на шампионите. Што се однесува до иднината на Венгер, тој има договор на уште две години.
Во Арсенал сигурно ќе има измени во играчкиот кадар на лето. Голем дел од играчите ќе бидат продадени за да се направат места за нови засилувања. "Топчиите" се заинтересирани за Марио Гетце, Лукас Подолски, Еден Хазард и Матиас Суарез.
Поранешниот играч и тренер на Арсенал, Џорџ Грем го искритикува Венгер поради тоа што не купува проверени фудбалери туку често се потпира на младите и недокажани играчи.
"Јасно е дека клубот мора да претставува млади играчи, меѓутоа истовремено мора да купува и веќе оформени како што тоа го прави Алекс Фергусон на пример. Тој лансира млади играчи но истовремено не се плаши да даде 25 милиони фунти за фудбалер од страна. Тоа не е случај во Арсенал", изјави Грем.
|