Екипата на Наполи синоќа постигна победа во првиот осминафинален натпревар од Лигата на шампионите. На стадионот „Сан Паоло“ во Неапол совладан беше тимот на Челзи со 3:1, иако гостите од Лондон поведоа со 1:0.
Првиот гол во 27.минута го постигна Хуан Мата, а потоа следуваа головите на домашната екипа во 39.минута изедначи Езекил Лавеци на 1:1. На 2:1 зголеми Единсон Кавани во судиското надополнување на првиот дел (45+ 2 минути), додека конечните 3:1 ги постави Лавеци со својот втор гол во 65.минута.
Македонскиот репрезентативец Горан Пандев во дресот на Наполи во игра влезе во 82.минута на местото на Марек Хамшик.
На вториот дуел синоќа во Москва, ЦСКА и Реал Мадрид одиграа нерешено 1:1. „Кралскиот клуб“ поведе преку Кристијано Роналдо во 28.минута, а ЦСКА изедначи во судиското надополнување на вториот дел (90+3), стрелец беше Понтус Вернблум.
Вечерва се играат последните два осминафинални натпревари: Базел – Баерн Минхен и Олимпик Марсеј – Интер.
Претходната недела се одиграа натпреварите: Милан – Арсенал 4:0, Олимпик Лион – АПОЕЛ 1:0, Баер Леверкузен – Барселона 1:3 и Зенит – Бенфика 3:2.