Веднаш по мечот меѓу Базел и Баерн Минхен во соблекувалната на "баварците" било многу интересно, но и премногу бучно. Не се споменува кој бил најгласен во нервозата, но дефинитивно може да се погодува дека еден од нив бил тренерот Јуп Хејнкес. Има незадоволство и кај играчите, па останува деновиве да се види како ќе течат работите.
Дека Баерн имаше катастрофален меч потврдува и Франц Бекенбауер, кој е почесен претседател во клубот.
"Сите на терен беа задоволни од нерешениот резултат, но не и резервите на Базел. Тие ја 'зезнаа' цела работа", коментираше во шега Бекенбауер.
Покрај тоа ги искритикува и главните ѕвезди на тимот.
"Резултатот не е добар за Баерн. Базел има тим кој е во состојба да даде гол и без да создаде некоја голема шанса за тоа. Швајцарците победија заслужено. Робен и Рибери не направија ништо на теренот, а одбраната беше вистинска катастрофа. Дури четворица беа само гледачи кога Штокер го постигна голот", изјави популарниот Кајзер.