Голем пораз за репрезентацијата на Македонија на пријателскиот меч со Луксембург. Домаќинот славеше со 2:1 во меч со пресврт и во меч за кој обложувачите знаат да кажат "два у кец" или 30 коефициент. Секоја чест за нашите фудбалери кои уште еднаш ни приредија срам од светски размери за комплетниот фудбал и спорт во оваа држава. Големите репрезентативци и "играчишта" кои вредат "милиони" паднаа на колена во битката со аматерите од Луксембург. На колена се момците на големиот и многу фалениот Џон Тошак. Избраниците на "фудбалскиот крвник" Харалампие Хаџи-Ристески под чие водство овој национален тим е пропаднат, уништен и безвреден.
Трагедијата која ни се случи синоќа е болка за сите оние кои сме во фудбалот, за сите оние кои се дел од националниот тим и за сите оние кои го сакаат и навиваат за државниот тим. Сите овие кои беа во Луксембург направија подеднаква лакрдија како онаа во Андора без разлика на тоа што во тоа време тоа беше меч од квалификациски карактер. Ова е пријателски дебакл, но и пораз кој ги премина сите граници.
Леле, леле... ни се случи Луксембург! Дали сме свесни од кого загубивме!? Од репрезентација која е на 133. место на ФИФА рејтинг листата. Точно дека и ние не сме некоја велесила, но Луксембург!? Ви се молам...!? Овие наши фудбалери не знаат за доста кога станува збор за поразите на кои сите ни се смеат. Во моментот кога помисливме дека ова е дното и дека нема подолу ни се случува спротивното. Ни се случува пораз за плачење. Ова е невидено, ова не е можно да ни се случува.
А добро тргнавме. По само 25 минути игра поведовме со првенецот на Хасани. Имавме водство, но не блескавме. Луксембург со дефанзивна игра ги затвори сите приоди кон нивниот гол. Но на нашите фудбалери победата како да им удри во глава на полувремето па така во вторите 45 минути делувале како загубени на теренот иако преку Пандев и Деспотовски сме имале супер шанси и за втор гол. Потоа Луксембург случајно израмнува на 1:1 во 56. минута по шутот на Девил од 20 метри, а во третата минута од судиското продолжение ни се случи дебаклот, ни се случи поразот. Нашите фудбалери свесни дека и нерешениот резултат е неуспех тргнале со сите сили по корнерот од десната страна. Следи "кикс" на Лазевски и зицер на Девил, кој по вторпат ја тресе нашата мрежа.
Тоа е она што успеавме да го добиеме како информации за сето она што се случувало во Луксембург. Лакрдијата ја видоа само оние кои се дел од истата на чело со нивниот лидер Хаџи-Ристески. Прилепчанецот сигурно е горд на ова што го направи со репрезентацијата. Никој не е како него! Никој не губи како нас од аматери како што се Лихтенштајн, Андора, Луксембург. Кој е следниот што ќе ни го земе скалпот и кој со нас ќе пишува историја. Она што е најважно е тоа дека ние сме и дефинитивно фудбалска дефиниција за правење на глупости. Момци секоја чест! Вие сте нашите "херои" и пример за децата како не треба да се бранат боите на оваа држава и како не треба да се игра кога се носи репрезентативниот грб. Можеби помладите генерации ќе научат да бидат поинакви од вас и да не бидат "лузери"! А од вас толку беше... Една голема "гола вода" и профитери кои преку националниот тим стигнавте до трансфери, до пари на штета на фудбалот во оваа држава.