Комесарот за натпревари при Фудбалската федерација на Македонија, Миле Спиркоски, го одложи натпреварот Шкендија – Вардар од 20-тото коло во Првата фудбалска лига за утре, бидејќи Шкендија не успеа благовремено да обезбеди терен за одигрување на овој дуел.
ФФМ ја задолжи Шкендија до 10 часот денеска да го извести органот за натпреварување на кој стадион надвор од Тетово ќе го одигра погоренаведениот натпревар, согласно известувањето добиено од МВР дека во Тетово нема услови да се игра лигашки фудбал оваа недела.
Вториот клуб од Тетово кој во оваа коло требаше да биде домаќин на „Градскиот стадион“, екипата на Тетекс, својот натпревар против Напредок ќе го одигра утре на стадионот „Борис Трајковски“ во Скопје.
Двојките за другите четири натпревари од ова коло се: Работнички - Ренова, 11 Октомври - Охрид, Хоризонт Турново - Силекс и Металург - Брегалница. Почетокот е закажан за денес од 14 часот.
Табела: Вардар 47 бодови, Металург 40, Шкендија 39, Силекс 27, Ренова 25, Брегалница 25, Напредок 22, Охрид 21, Работнички 20, Тетекс 18, Хоризонт Турново 16 и 11 Октомври 11.