Синоќа беше одреден првиот финалист во Лигата на шампионите, а вечерва во Мадрид ќе биде познат и противникот така што финалната двојка ќе биде веќе формирана и ќе се тргне со подготовки за дуелот кој на 19 мај ќе се одигра во Минхен. Баерн има предност од првиот дуел против Реал од 2:1, а овој резултат најавува возбудувања на Сантијаго Бернабе и натпревар во кој нијанси ќе решаваат кој тим ќе се пласира во финалето.
На Баерн му треба гол бидејќи Реал речиси сигурно ќе успее да го совлада Нојер. Сезонава "кралевите" се најефикасни и во ЛШ и во Примера, па оттаму нивниот напад е подготвен повеќе од еднаш да ја тресе мрежата на противникот. Затоа вечерва ќе се следи напаѓачки и отворен фудбал. Реал не смее да чека и мора да нападне, а Баерн ќе мора да го одбрани резултатот од првиот меч. Победа од 1:0 одговара за домашните, 2:1 води во продолженија, а секоја друга победа од еден гол е позитивна за Баерн. На Реал во друг случај му треба победа од два гола разлика за да може да дојде до финалето.