Финалистите во Лигата на шампионите го имаат уште само денешниот ден за да се подготват за натпреварот кој ги очекува утре и на кој ќе треба да го дадат максимумот за да се изборат за најголемиот трофеј во евро сезоната. Баерн Минхен ја имаше таа можност на свој терен да се бори за титулата во Лигата на шампионите, а Челзи, пак, ќе треба уште еднаш да покаже дека пласманот во финалето не е резултат на случајност.
Ден пред мечот и двајцата тренери имаат интересни размислувања, а секој се обидува да тактизира и притисокот да го префрли на противникот.
ХЕЈНКЕС СТРАВУВА ОД ПРОТИВНИКОТ
Стратегот на Баерн, Јуп Хејнкес вели дека не може да биде сигурен со каков состав ќе излезе на терен екипата на Челзи и каква ќе биде играта.
"Видливо е дека Челзи има различен стил на игра и дека често ги менува составите. Против Бенфика играа една игра, но против Барселона излегоа со сосема друг состав. Очекувам Челзи да биде сосема поинаков во однос на полуфиналето. Екипата во минатите денови беше на одлично ниво и игра се подобро. Покрај тоа во составот имаат искусни играчи и јасно е дека ветераните, кои со години играат за Челзи, сакаат да освојат нешто големо. Сето ова е многу опасно за нас и ни дава дополнителна тешкотија. Мораме да бидеме свесни дека ќе ни претстои многу тешка задача и моето мислење е дека шансите се 50-50", вели Хејнкес.
ДИ МАТЕО ГИ МОТИВИРА ИГРАЧИТЕ
Менаџерот на Челзи се обидува да им влее дополнителна самодоверба и мотив на своите играчи зборувајќи им дека тоа што ќе играат финале на теренот на противникот може да биде и шанса да се изненади.
"Оваа средба може да ја определи историјата на нашиот фудбалски тим. Се разбира тоа би било првпат да стигнеме до трофејот во ЛШ. За нас само тоа ќе биде успех. Сметам дека и двата тима имаат свои шанси за победа. Домашниот терен секако ќе биде голем плус за Баерн, но мислам дека и ние знаеме да се носиме со овој факт и ќе знаеме како да стигнеме до позитивен резултат. Ќе се потрудиме да бидеме на потребното ниво и да го дадеме максимумот. Ова е многу важен дуел и сите мораме да бидеме максимално мотивирани и да го извлечеме најдобро од секого", изјави Ди Матео.
ЧЕЛЗИ ВЕЖБА ПЕНАЛИ
За да се случи да има пенали во финалето ќе мора и после 90 минути, но и после дополнителните 30 да нема победник. Во Челзи веќе како да го знаат резултатот и да знаат дека нема да има тим со предност ниту после 120 минути игра, па на последните тренинзи изведуваа пенали. Тие се обидуваат да бидат колку е можно подобро подготвени доколку дојде до пенал рулет, а сето ова може да биде многу значајно во моментите кога ќе треба да падне одлуката кој ќе дојде до пехарот.