Низ два дена собир во главниот град пред пријателските натпревари со Португалија и Ангола во Леирија, односно Есторил, македонската репрезентација главно одработува порелаксирани тренинзи во некомплетен состав. Вчера, селекторот Џон Тошак поради лошите временски услови на помошното игралиште со вештачка трева на Работнички им сервираше на репрезентативците пократок тренинг од околу 30 минути обидувајќи се да пренесе дел од сопствените тактички замисли за дуелите кои не очекуваат на крајот од овој месец.
Факт е дека во периодот кој следи за националите ќе треба пред се силно враќање од психолошки аспект, по оној срамен претходен пораз од Луксембург, но дел од пристигнатите репрезентативци веќе навестуваат позитивно расположение и можност сето тоа да се избрише на овие два следни контролни дуели.
"Натпреварот со Португалија е одличен момент да се избрише претходниот срам од Луксембург.
Нема друго, мора зад нас да го оставиме тој пораз на кој не сакаме ниту да се потсетуваме. Против Португалија и Ангола треба да покажеме дека има квалитет во оваа генерација кој може на македонскиот фудбал да му подари вистински радости. Токму резултатот против Луксембург но и фактот дека играме со една од најсилните светски селекции се повеќе од доволен мотив за вистинско надигрување со Роналдо и соиграчите", веќе континуирано стандардниот "столб" во нашата одбрана, Ванче Шиков.
Еднакво е размислувањето и на останатите репрезентативци дополнувајќи дека натпреварите со "европските Бразилци", како и со Ангола, е и еден вид создавање на слика за она што селекцијата всушност ја очекува на септемврискиот старт од квалификациите за Светското првенство 2014 во Бразил.