Македонскиот фудбалски шампион Вардар ги заврши подготовките за настапот в среда во квалификациите од Лигата на шампионите против белорускиот БАТЕ Борисов.
- Максимално сме подготвени за натпреварите со БАТЕ Борисов. Белорускиот шампион е силен и ние го респектираме, но веруваме и во своите квалитети и се надеваме на успех. Очекувам неколкуте нови играчи во екипата да ја оправдаат довербата и со нив Вардар да го продолжи стилот на игра од минатата сезона кога изградивме победничка концепција. Секаде одиме на победа, така ќе биде и во Белорусија, изјави тренерот Илчо Ѓорѓиоски на прес-конференција во просториите на клубот.
Ѓорѓиоски упати комплименти за играта на белорускиот шампион.
- Не значи дека отсуството на Бага и на Брешан, едни од најдобрите играчи на БАТЕ Борисов, ќе ни ја олесни работата. Противникот има уште многу квалитетни играчи и доколку сакаме позитивен резултат ќе треба да дадеме се од себе против нивниот квалитетен тим, рече тренерот на Вардар.
Капитенот на „црвено-црните“ Милан Илиевски изјави дека е голема чест да се носи капитенската лента на најтрофејниот македонски тим. Тој најави огромна борба на теренот за секоја топка и во секој дуел од страна на вардаровите фудбалери.