По продажбата на своите две ѕвезди во ПСЖ, Милан се обидува да ги смири своите навивачи со пораката дека клубот до крајот на летото ќе се засили со фудбалер - шампион. Потпретседателот на клубот Адриано Галијани порача дека во екипата ќе дојде достојна замена за Златан Ибрахимовиќ по што клубот освен што ќе се стабилизира финансиски повторно ќе биде оној стариот кој ќе атакува на титули.
"Гледам многу бес, меѓутоа сакам да ги смирам сите што се чувствуваат така дека има време до 31. август за донесување на нови играчи. Бидете сигурно дека шампион ќе пристигне во Милано. Един Џеко, Карлос Тевез...? Ќе почекаме", изјави Галијани кој потврди дека клубот нема да го продаде Робињо.
"Нема да го продадеме Робињо и нема да ја вознемируваме Рома за Дестро ("волчицата" е косопственик со Џенова)", изјави Галијани.
Логичен е бесот на навивачите на "росонерите" бидејќи со ова италијанскиот клуб покажува дека "омекнува" кога ќе види пари. Милан со овој ростер кој остана е далеку од кандидат за шампионски трофеј во новата сезона. Италијанскиот гигант загуби две големи ѕвезди, а со тоа опадна и квалитетот на италијанскиот фудбал.