Со двата гола постигнати синоќа на натпреварот против Бетис, аргентинскиот фудбалски интернационалец Лионел Меси и донесе победа на неговата Барселона, а воедно стигна до бројката од 86 постигнати голови во една каледнарска година со што го сруши досегашниот рекорд на Герд Милер постигнат во 1972 година кој изнесуваше 85 голови.
Меси 86.те голови ги постигна во 66 одиграни натревари, додека Германецот Милер пред 40 години одиграл шест натпревари помалку за да стигне до неговиот резултат од 85 погодоци.
По синоќешниот натпревар во Севиља со Бетис кој Барселона го доби со 2:1 Меси не му придаде поголемо значење на рекордот, туку ја нагласи важноста на победата на неговиот клуб.
- Убаво е кога се поставуваат рекорди, но поважно беше што Барселона ги освои трите бода и ја задржа предноста на врвот на табелата пред конкурентите за титулата. Нашата цел оваа сезона е освојување на Лигата на шампионите и шампионската титула во Шпанија, истакна Меси.
На другите натпревари од 15.коло во Примера постигнати се следниве резултати: Еспањол - Севиља 2:2, Сосиедад - Хетафе 1:1, Малага - Гранада 4:0, Ваљадолид - Реал Мадрид 2:3, Осасуна - Валенсија 0:1, Леванте - Мајорка 4:0, Атлетик Билбао - Селта 1:0 и Атлетико Мадрид - Ла Коруња 6:0.
Вечерва играат Рајо Ваљекано - Сарагоса.