Финалниот натпревар од годинашното издание на Купот на Шпанија, пресметката на "Сантијаго Бернабеу" помеѓу градските ривали, Реал (М) и Атлетико (М), заврши со минимален триумф на "јорганџиите" од 2:1. Кралевите го отворија резултатот со погодокот на Роналдо, а на 1:1 израмни Диего Коста. Решавачкиот погодок, постигнат во второто продолжение од по 15 минути беше дело на бразилскиот интернационалец, Миранда.
Помалку познатиот преставник на шпанската престолнина најпосле го прекина постот од 14 години без триумф над Реал (М). Освен по погодоците, финалниот дуел ќе биде запаметен и по исклучувањето на Жозе Мурињо кој се жалеше на секоја судиска одлука и по црвениот картон кој го заработи најголемата ѕвезда во дресот на Реал (М), Кристијано Роналдо. „Атлетико Мадрид не заслужи да победи. Имаа многу среќа при резултат 1-1, трипати ги погодивме рамките од голот, а имавме и две убави шанси во продолженијата. Но, сепак, не се бројат ниту шансите, не се памети ниту лошото судење, ќе остане запишано дека Атлетико го освои трофејот. Ова е најлошата сезона во мојата кариера, многу лоша и за Реал Мадрид, со само еден трофеј, а без ниту една значајна титула. Но, јас никогаш не се кријам после пораз. Сезона што за други тренери би била многу добра, за мене е очајна“, изјави Мурињо.