Претседателот на Фудбалската федерација на Романија, Мирчеа Санду потврди дека Романија ќе има свој преставник во најпрестижното клупско натпреварување, Лигата на шампиони и доколку актуелниот шампион на оваа земја, Стеауа, која е противник на Вардар во 2. квалификациско коло, биде исфрлен од ЛШ поради неправилности со лиценцирањето и финансискиот фер-плеј.
Доколку како точна се покаже изјавата на претседателот на ФФР, тогаш противник на актуелниот шампион на Македонија, Вардар, ќе биде вицешампионот на Романија, тимот на Пандури.
„Романија нема да го загуби местото во ЛШ. Според пропозициите, ако Стеауа е казнета, треба да биде заменета со вицешампионот, а местото на вицешампионот да го земе следниот тим за Лига Европа пласиран на табелата. Ова се статутарни членови. Веќе двапати разговарав со луѓето од меѓународниот оддел, каде според правилникот за лиценцирање, местото го зема секој следен кој има добиено валидна лиценца“, изјавил Санду за романските медиуми.