Карло Анчелоти верува дека Кристијано Роналдо и Герет Бејл можат да играат заедно и покрај мислењето на фудбалските стручњаци дека овие двајца фудбалери се многу слични по стилот на игра и дека тешко ќе функционираат кога заедно се во составот.
- Нема да го користам Роналдо како централен напаѓач. Најдобрите мора да ги ставите на нивната природна позиција. За сега оди добро. Бејл е одличен фудбалер, млад е, имаше голема желба да дојде во Мадрид и верувам дека добро ќе се снајде, изјави Анчелоти.
Италијанскиот стручњак на клупата на „кралскиот клуб“ најави форсирање на систем кој ќе им овозможи и на Роналдо и на Бејл да го прикажат најдоброто.
Герет Бејл на крајот од летниот преоден рок прејде од Тотенхем во Реал Мадрид за сума од 100 милиони евра и со тоа стана најскапиот фудбалер на светот, потиснувајќи го токму клупскиот колега Роналдо на втората позиција.