Македонскиот интернационалец во редовите на Наполи, Горан Пандев со гол вчера вечер го прослави јубилејот 300 натпревари одиграни во Серија А на Олимпико стадионот во Рим против екс тимот Лацио.
Пандев во 50-та минута по втор пат на натпреварот му донесе предност на Наполи, откако претходно во 24-та Гонзало Игуаин го отвори резултатот, а Валон Берхрами со авто гол една минута подоцна израмни на 1-1.
По погодокот на Пандев кој беше вкупно 4-ти за Наполи оваа сезона, тој асистираше и на третиот на натпреварот кој пак беше дело на Гонзало Игуаин во 72-та минута. Белде Диао Кеита погоди за домаќините во 88-та минута, а конечните 2-4 за гостите од Неапол ги постави Хозе Марија Калехон при самиот крај на натпреварот.
На претпоследниот натпревар од 14-то коло во Серија А, Фиорентина со 4-3 во возбудлив натпревар со седум постигнати гола го совлада тимот на Хелас Верона.
Со победата над Лацио, Наполи се зацврсти на третата позиција на табелата со 31 бод, шест помалку од лидерот Јувентус.