Македонската фудбалска репрезентација денеска се собира за претстојниот пријателски двомеч против Кина на 18 јуни во Шенгјанг и четири дена потоа во Јинан. Селекторот Бошко Ѓуровски повика 22 фудбалера меѓу кои само тројца што настапуваат во странство. На пат кон Далечниот Исток, најверојатно, ќе ги поведе сите со оглед дека до вчера, според портпаролот на Фудбалската федерација на Македонија (ФФМ) немаше најави за откажувања.
Собирот е закажан за денеска, во хотелот „Скала“ каде репрезентативците ќе отседнат до 15 јуни. До заминување до крајното одредиште во Кина, преку Истанбул и Пекинг, ќе реализираат осум тренинзи во македонскиот главен град. Првиот ден ќе работат еднократно по што ќе следува удвојување на дневната доза. Подготовките ќе се одржат на комплексот терени на Куќата на фудбалот.
Победа, реми и пораз во 2014 година
Во оваа календарска година националниот тим одигра три контролни средби во кои селекторот почувстува и вкус на победа, реми, и горчина на пораз. Триумфот го имаше против Летонија (2:1) во дебито на репрезентативното кормило, потоа Македонија загуби во Куфштајн, Австрија, од Камерун, учесник на претстојниот мундијал во Бразил, со 0:2 и ремизира против Катар (0:0) во Риети, Италија.