Мундијалот во Бразил ќе помине без најпопуларниот и најконтроверзен тренер во денешниот фудбал, Жозе Мурињо. Португалскиот стратег ќе го нема во Бразил не затоа што имаше неуспех туку затоа што досега никогаш не бил селектор на некоја репрезентација. Мурињо открива дека има можност да води една репрезентација, но тоа не го сторил и тоа по сугестија на неговата сопруга.
Португалецот изјави дека пред неколку години можел да биде предводник на некогашниот светски првак Англија, но решил да не ја прифати оваа понуда и тоа по сугестија на неговата жена. Во изминативе 10-тина години Мурињо се промовираше во еден од најдобрите светски тренери. Почна на клупата на Порто, а потоа успешно работеше во Челзи, Интер и Реал, за сега повторно да се врати на „Стемфорд Бриџ“ во лондонскиот тим.
ГО ПОСЛУШАЛ СОВЕТОТ И НЕ ЗГРЕШИЛ
„Жена ми сугерираше дека не треба да ја профатам селекторската функција во Англија и сосема беше во право. Тоа беше голема одлука која ја донесовме заеднички уште пред седум години. Едноставно не можам да чекам две години за големо натпреварување, а до тогаш да играм со репрезентации како Казакстан и Сан Марино“, рече Мурињо.
Португалецот вели дека сака неговата работа да му биде подинамична и да може секоја недела да има обврски. „Што да правам наредната недела? Би можел да одам на тренинг на некој од репрезентативците и да ги следам како работат. Би патувал од место на место, но нема да имам натпревари. Жена ми ми рече дека јас без фудбал и акција не можам да функционирам и тоа е сосема во право. Затоа и откажав да бидам селектор на Англија“, открива Мурињо.
Англија се надеваше дека со Мурињо конечно повторно ќе се израдува на големо натпреварување. „Гордиот албион“ во својата историја има трофеј од Мундијалот во 1966 година кога беа домаќини, додека никогаш не биле најдобри на европско првенство. Англичаните веруваат дека токму во Бразил би можеле го повторат најголемиот успех во нивната историја, остварен пред 48 години.