Светската фудбалска куќа ФИФА ќе и исплати на Барселона обештетување за повредата на Нејмар во висина од околу 238,000 евра. Бразилскиот вондеркид се повреди на четвртфиналниот меч против Колумбија и не можеше да му помогне на Бразил на дуелот против Германија во полуфиналето. Како што е познато Нејмар има пукнатина на третиот грбен пршлен, а според лекарот на репрезентацијата Хозе Луис Рунко играчот ќе паузира околу 45 дена. За време на рехабилитациониот процес Нејмар ќе пие таблети за болки, ќе носи специјален појас и ќе треба многу да одмара.
Согласно правилникот на ФИФА во случај на повреда на играч за време на меч за репрезентацијата обештетувањето почнува да му се исплаќа на клубот по 28. ден од повредата на играчот.
Официјалниот договор на Нејмар со Барселона е со годишна плата од 5,1 милиони евра. Според тоа ФИФА ќе и плаќа на Барселона по 13,972 евра на ден почнувајќи од 2. август во следните 17 дена колку што се претпоставува дека ќе трае рехабилитациониот процес. По завршувањето на настапите на Мундијалот Нејмар се враќа во Барселона но ќе ги прескокне претсезонските подготовки на екипата, а ќе се врати на терените пред почетокот на новата сезона.