На Рома и се случи истото што им се случи на Бразилците на Мундијалот. Практично им се случија Германците кои беа безмилосни кон нивниот гол. Баерн тргна силно уште од стартот на средбата и без проблеми го решеташе голот на Де Санктис кој им беше од голема помош бидејќи имаше неверојатно лоша вечер. Дури и резултатот на полувремето и на крајот е идентичен.
Фудбалерите на Баерн Минхен доминираа на теренот уште од стартот на средбата, а откако успеаја да го постигнат првиот гол во 9. минута преземеа целосна контрола на натпреварот и го средија противникот. Рома не можеше да стори ништо, а грешките кои следеа во продолжение од средбата ставија до знаење дека Баерн на овој меч е далеку поквалитетниот противник.
Де Санктис мораше да ја вади постојано топката од својата мрежа, а како што течеше средбата лесно можеше да има уште некој погодок и првото полувреме да заврши со далеку повисока разлика. Сепак, петте гола кои беа постигнати за период од 27 минути игра ставија до знаење кој е кој на теренот. Оттаму во последните девет минути од првото полувреме работите не се сменија, па на одмор беше 0:5.
Во вториот дел текот на настаните беше ист како и на дуелот меѓу Бразил и Германија.
Рома успеа да постигне почесен гол, а потоа следуваа уште два и во 80. минута резултатот беше идентичен како во полуфиналето на Мундијалот.