Капитенот на македонската кошаркарска репрезентација Перо Антиќ ги повика своите соиграчи на максимална борбеност во текот на целиот натпревар.
- Мора да се вратиме и да заиграме посилно. Да најдеме начин да се кренеме, да продолжиме да се бориме во наредните натпревари. Следниот е решавачки, или ќе продолжиме да се бориме, или ќе се вратиме дома. Мораме поенергично на теренот од стартот, не да чекаме противникот да направи предност, па потоа да ја бркаме. Потребно е да се бориме максимално од почетокот во сите 40 минути, истакна Антиќ пред вечерашниот натпревар со Нов Зеланд.
Македонскиот капитен за синоќешната победа на Ангола вели дека била заслужена, а упати комплименти за играта на Анголците.
- Тие имаа одлична шутерска серија, со повеќе од 70 проценти реализација за три поени и тоа е тешко да се брани. Сите нивни шутеви беа преку наш одбранбен играч и тие имаа навистина добар ден. Ангола е добра репрезентација, физички доста подготвена и им ја честитам победата која ја заслужија, рече Антиќ.