Српскиот тенисер, Новак Ѓоковиќ, втор пат по ред во финалето на Вимблдон го порази Роџер Федерер и пред нос му ја однесе титулата. Во разговор со новинарите, Ноле откри дека малото прекинување на мечот поради дождот во третиот сет се покажало како одличен момент за разговор со својот тренер Борис Бекер.
-Ме посоветува да ги упростам работите, да се сетам зошто сум тука, на важноста на мечот и фактот дека секое утро се будите, тренирате, работите и ги повторувате истите нешта со цел да се најдете во позиција да се борите за најголемата титула на светот и да играте со еден од најголемите ривали. Се обиде да ме охрабри и да ја извлече од мене менталната сила, како и да ми ја пренесе целата поддршка, рече Ѓоковиќ.
Очигледно Германецот одлично си ја заврши својата работа што резултираше со победата на српскиот тенисер.
-Финалето лесно можеше да биде благонаклонето кон Федерер, но паузата поради дождот ми одеше во прилог. Борис се симна и малку разговаравме. Знаев во кои сегменти морам да бидам подобар и после тоа изиграв подобро, додава Ноле.