Плоцк, 15 март 2016 (МИА) – Македонскиот ракометен првак Вардар утревечер го очекува првиот дуел од осминафиналната пресметка во Лигата на шампионите со Висла Плоцк, а пивотот на „црвено-црните“ Стојанче Стоилов повикува на претпазливост и максимално залагање во текот на сите 60 минути.
- Се надевам дека ќе одиграме добро. Полјаците се незгоден противник и не смееме никако да ги потцениме. Минатата година имавме тежок натпревар таму, мислам дека се случи токму тоа, ги потценивме и тоа ни се удри од глава. Има квалитет кај нас, но имаме и некои проблеми со повредени играчи, се надевам дека тоа нема да влијае на резултатот, вели Стојанче Стоилов.
Вардарци на гостувањето во Полска одат во добра форма, по три победи и ремито со Веспрем, додека Висла го победи Кјелце во домашното првенство пред само два дена.
- Со Кјелце немаа некој резултатски притисок и можеби поради тоа победија. Кога мора да победите друг е притисокот, тогаш е многу потешко. Мислам дека оваа година Висла е малку подобра од лани, но ние сме попаметни и поискусни за една година и се надевам дека ја научивме лекцијата и дека ќе ги сфатиме максимално сериозно, истакна Стоилов.