„Црвено-црните“ ја освоија 11. Куп титула, откако во финалето го совладаа Металург со 31:24.
Металург не успеа да приреди сензација во финалето на Купот на Македонија, избраниците на Лино Червар имаа сили за едно полувреме по што Вардар искусно го приведе мечот во своја корист и го освои 11. трофеј во ова натпреварување.
„Металурзите“ добро им парираа на Вардарци во првиот дел, на стартот имаа предност, а откако во 19. минута имаа негатива од 7:13 набрзина направија серија од 5-1 и намалија на 12:14. Но „црвено-црните“ на одморот зголемија на 12:16.
Во продолжение искусниот состав на Вардар не му дозволи на противникот да помисли да направи пресврт за трета титула по ред или вкупно 11. во Купот на Македонија. Манасков со седум погодоци од кои шест седмерци беше најефикасен кај победникот каде еден гол помалку имаше Дибиров.