Борко Ристовски со 13 одбрани се врати на голот на македонската репрезентација. За голманот на Барселона тимската игра е клучот за триумфот над Исланд (30-25), но и за успех во квалификациите.
„Ние одигравме натпревар кој е доста поразличен од тие претходно што ги имавме, барем на тактички план. Затоа што мислам дека имавме смер по кој треба да се движиме, имавме тактичка насока од селекторот каде што секој знаеше што треба да одработи и нормално за мене е важно да се знае ред и да се има дисциплина. Потоа тие задачи кои ги дава селекторот, нормално е дека некој ќе има подобар ден денеска, додека пак некој тоа ќе го стори утре. Многу е важно на тактички план да сте добро поставени и да знаете што се бара од вас во играта во напад и одбрана. Така да мислам дека ова е добро. Во Барселона работиме доста слично на тактички план, исто така беше и во РНЛ, горе доле овие млади играчи кои се запознаваат со овој тип на работа имаат што да научат и да напредуваат во кариерата. Покажавме сосема солидна игра против една репрезентација која што е квалитетна и сигурен сум дека нашата игра во иднина може само да се подобрува. Кажав ние нема да смениме ништо на тактички план, но, може секој од нас да ја подобри индивидуалната игра. Не е воопшто важно, важно е секој од нас да ја подобри својата игра и тоа нели е клучот за успехот. Да се стремите да одиграте секој натпревар на уште повисоко ниво. Две средби да се одиграат на едно високо ниво против Исланд ќе биде тешко. Имаме квалитет, имаме тактичка база за во иднина и се надевам дека ќе биде успешна" изјави Борко Ристовски.