Новак Ѓоковиќ и неговата сопруга Јелена се позитивни на коронавирусот. Тенисерот веднаш по враќањето од „Адриа тур“ во Задар, го посетил својот доктор и побарал заедно со своето семејство и членовите на тимот, да биде тестиран на вирусот.
-Веднаш штом се вративме во Белград отидовме да се тестираме. Мојот резултат е позитивен, исто и оној на Јелена, додека резултатите на нашите деца се негативни, стои во соопштението на тенисерот.
Тој вели дека го организирале турнирот со чисто срце и со добра намера, надевајќи се дека вирусот е ослабнат, но за жал короната е се уште присутна.
-Навистина жалам за секој одделен случај на инфекција. Се надевам дека ничија здравствена ситуација нема да се комплицира и дека сите ќе бидат добро. Ќе останам во самоизолација во следните 14 дена и ќе го повторам тестот за 5 дена, вели Ѓоковиќ.
Тој и неговата сопруга немаат симптоми и се наоѓаат во добра здравствена состојба.