Српскиот тенисер Новак Ѓоковиќ попладнево даде изјава по одлуката на австралискиот суд со која беше поништена неговата депортација.
-Задоволен сум и благодарен што судијата ја спречи депортацијата. И покрај сè што се случи изминатава недела, сакам да останам и да учествувам на Австралија опен, изјави Ѓоковиќ.
-Во моментов можам само толку да напишам и секако огромно БЛАГОДАРАМ до сите ширум светот кои ми дадоа поддршка и сила и ме охрабрија да останам присебен и силен.
Денес, судијата на Федералниот суд во Мелбурн, Ентони Кели, ја усвои жалбата на Ѓоковиќ поради укинувањето на визата од страна на австралиската гранична служба и нареди негово ослободување од имиграцискиот притвор во рок од 30 минути по завршувањето на сослушувањето.
Претходно, ноќта на 6 јануари, на Србинот не му беше дозволен влез во Австралија поради недоволни податоци за медицинско ослободување од вакцинација против коронавирус, но спортистот ја оспори оваа одлука на суд.
Ѓоковиќ е деветкратен и актуелен шампион на Австралија опен. Вкупно, 34-годишниот Србин има освоено 20 титули на Грен слем турнирите, исто толку имаат и Роџер Федерер и Рафаел Надал.