Прва победа за ватерполо репрезентацијата на Македонија во Светската лига остварена против репрезентацијата на Грција, големиот ривал и тоа не само на спортски план.
Пред преполни трибини на „Олимпискиот базен“ во Скопје вечерва сосема заслужено избраниците на селекторот Стеван Нонковиќ победија со резултат 7:6. По четвртини беше 2:2, 2:1, 2:0 и 1:3.
Головите за Македонија ги постигнаа Небојша Милиќ 2, Даниел Бениќ, Ненад Босанчиќ, Горан Крстоношиќ, Ненад Петровиќ и Еди Бркиќ по еден. Освен стрелците на головите и останатите играчи кои настапија имаа голем придонес во победата, а тука пред сите треба да се истакне голманот Далибор Перчиниќ кој со своите 14 одбрани го одржа ветувањето дека ватерполистите ќе и донесат радост на две илјадната публика присутна во базенот и на цела македонска нација.
Македонија и покрај вечерашнава победа остана на последното место во третата група од Светската лига со три освоени бодови.
Во вториот натпревар од оваа група Хрватска со 12:7 ја победи на гости Русија.
Табела по пет одиграни кола: Хрватска 13 бодови, Грција 8, Русија 6 и Македонија 3.