Кошаркарите на Бостон рано утрово стигнаа до првата победа во годинашново НБА финале против Лос Анџелес Лејкерс. Во неизвесен натпревар во „Стејлпс центарот“ Бостон славеше со 103:94 за 1:1 во победи во финалната серија која сега се сели на Исток.
Дека се подготвени за триумф гостите покажаа во првата четвртина која им припадна со 29:22, но шампионот ЛА Лејкерес сепак успеа да стигне до израмнување и на стартот на последниот период ниту една екипа немаше предност – 72:72. Предводени од извонредните Раџон Рондо, кој имаше „трипл дабл“ ефект 19 поени, 12 скокови и 10 асистенции и Реј Ален со извонредни 32 поена (8 тројки од 11 обиди - рекорд на финален натпревар) Бостон успеа да ја добие и последната четвртина со 31:22. Доминацијата Бостон ја покажа во последните две минути кога имаше скор од 10:4. Во редовите на шампионот Пау Гасол имаше 25 поени и 8 скокови, додека Коби Брајант остана на за него скромни 21 поен.
Натпреварот број 3 од финалната серија се игра во вторник навечер во Бостон. „Селтикси“ ќе бидат домаќини на следните три натпревари.