Кошаркарите на актуелниот НБА првак Лос Анџелес Лејкерс ја вратија предноста и поведоа во финалето со 2:1 откако рано утрово со 91:84 го победија Бостон на негов терен.
Доброто прво полувреме пред се во одбраната на „езерџиите“ им овозможи предност на полувремето од 52:40 што беше само најава на победата. Домашната екипа во неколку наврати успеа да се доближи резултатски, но не и да поведе. Во тие моменти клучен за победата беше Дерек Фишер кој во последните 9 минути постигна 11 од 21 поен за својот тим.
Најефикасен играч на натпреварот број 3 во финалната серија подобар од 7 беше Коби Брајант со 29 поени, додека играчот од клупата Ламар Одом натпреварот го заврши со 12 поени без промашување. Кај „селтикси“ Кевин Гарнет реализираше 25 поени, додека потфрли најдобриот играч од натпреварот број 2 Реј Ален, кој не погоди ниту еден шут од игра, а имаше само два поена. Од стартната петорка кај Бостон на 5 поени остана и Кендрик Перкинс.
Серијата од уште два натпревара продолжува во Бостон. Следниот се игра во четврток навечер.