Максимална победа од 4:0 оствари македонската машка шаховска репрезентација денеска против Макао во премиерното коло од Олимпијадата во Русија.
Владимир Георгиев против Дела Круз на првата табла и Никола Митков во дуелот со Роландо Фисалбон на третата табла победија со бели фигури, а Трајко Недев против Соломон Селис на втората и Филип Панчевски против Кенг Мак Кеи на четвртата табла победија играјќи со црни фигури.
За разлика од мажите, дамите стартуваа со убедлив пораз од 4:0 против селекцијата на Грузија која е актуелен Олимписки шампион.
Првата табла кај Грузијките, Нана Џагнидзе со бели фигури беше подобра од Габриела Коскоска, Саломе Мелиа со црни фигури ја победи Моника Стојковска на втората табла, Сопико Чучашвили играше со белите фигури и беше подобра од Бојана Бејатовиќ на третата табла, додека Бела Чотенашвили со бели фигури беше поуспешна од Драгана Николовска на четвртата табла.