Селекторот на македонската машка ракометна репрезентација Љубомир Савевски на денешната прес-конференција соопшти дека поднесува неотповиклива оставка.
- Клупски и лични интереси инволвираа една група репрезентативци и дел од медиумите на чело со една телевизиска куќа во непринципиелна и бескрупулозна кампања за дискретитација на мојата личност со цел да се изврши моја смена на селекторската позиција. Не сакам да учествувам во една таква валкана игра која ќе и штети на репрезентацијата пред почетокот на новите квалификации и затоа одлучив да поднесам неотповиклива оставка, рече Савевски.
Тој ги отфрли, како што истакна, сите лаги и невистини насочени против него од играчите кои биле извршители на сценариото за негова смена, а биле поттикнати директно од нивните претпоставени во клубот за кој настапуваат.
За сите негативни последици од настаната состојба и евентуалните неуспеси на натпреварите кои и престојат на репрезентацијата, Савевски ги обвини играчите кои одбија да тренираат под негово водство и како што рече луѓето од спротивниот табор.
За својата оставка Савевски вели дека е во интерес на македонскиот ракомет.
- Разговарав со претседателот на федерацијата Михајло Михајловски и моравме да најдеме решение, бидејќи квалификациите се ближат. Во овој момент најдоброто решение е оставката со цел репрезентацијата да се комплетира навреме и да се доработат подготовките за квалификациските средби со Естонија и Босна и Херцеговина. Сепак не е добро за иднината на ракометот неколку играчи да бидат над селекторот и од нив да зависи тренерското место, потенцираше Савевски.
Тој се заблагодари за поддршката која ја имаше од претседателот на ракометната федерација додека ја вршеше селекторската функција. За него најдобро е негов наследник да биде тренерот на Металург, екипа која дава 13 репрезентативци.
Савевски демантираше дека упатил пцости кон некои од репрезентативците кои вчера одбија да тренираат и дека тие сами одлучиле да ја напуштат репрезентацијата, а не биле избркани од него.