Норвежанецот Аксел Лунд Свиндал заздрави од опасниот пад во текот на викендот за да ја одбрани својата светска титула во супер-комбинација во понеделникот, додека Италијанецот Криштоф Инерхофер продолжи со својата неверојатна форма освојувајќи го третиот медал во Гармиш-Партенкирхен со второто место.
Свиндал, кој се повреди откако излета во бариерите во текот на спустот, водеше убедливо по утринскиот спуст, пред да издржи на многу стрмната Гудиберг патека за да го освои златото. Свиндал сега има 9 медали од СП и од Олимпијадите, од кои пет се златни.
Свиндал користеше нови чизми и скии во спустот, а во саботата удри во заштитната ограда по завршувањето на спустот повредувајќи ја главата и коленото.
"Бев на скенирање, и мојата глава е ОК. И моето колено е ОК", вели Свиндал.
Големиот Норвежанец сега има 5 златни, 2 сребрени и 2 бронзени медали на СП и Олимпијадите. Неговите претходни три светски титули дојдоа во спустот и велеслаломот во 2007 и комбинацијата од 2009. Тој исто така има и злато во супер-џи од Олимпијадата во Ванкувер во 2010.
Инерхофер, кој имаше само една победа во Светскиот куп пред стартот на првенството, сега има целосна колекција на медали. Тој освои злато во супер-џи и бронза во спустот.
"Навистина не ми се верува! Се обидов да ризикувам и да одам до крај. Сега се оди во моја корист. Ова е мое првенство", вели Инерхофер.
Тој стана првиот Италијанец со три медали на СП по Зено Цоло во 1950 година во Аспен, САД, а италијанското славење го продолжи и Петер Фил, специјалистот за спуст, кој го освои бронзениот медал.
Главниот фаворит за титулата, Хрватот Ивица Костелиќ, кој имаше три победи во исто толку ткри оваа сезона и е олимписки вице-шампион, реши да не се појави на трката и е на одмор на Јадранот. Костелиќ ќе се врати за велеслаломот и слаломот, но самиот призна дека сака да се фокусира на освојувањето на својата прва титула од Светскиот куп, каде што има огромна предност токму пред Свиндал.