Со доза на внимателност ракометарите на Вардар Про ќе влезат во дуелот од 1/8 финалето на Купот на куповите што в сабота го играат со данскиот тим Копенхаген. Иако противникот во моментов е на последната позиција во Данската прва лига сепак секоја екипа која доаѓа од оваа земја е сериозен ривал.
- Целиот период од подготовките акцентот беше ставен на дуелите со Копенхаген кои не очекуваат. Оваа екипа негува типичен дански ракомет кога станува збор за нападот, додека во одбраната имаат отстапување и повеќе играат во зона 3-2-1 или 3-3. Ќе треба да се спречи нивната контра и полуконтра за да постигнеме посакуван резултат, а тоа е што е можно повисока победа. За разлика од есенскиот дел екипата е засилена со доаѓањето на Марко Чурувија од Металург, истакна тренерот на Вардар Про Перо Милошевиќ на денешната прес конференција.
Противникот на Вардар Про е екипа која во 2008 година беше финалист во купот на ЕХФ, а во сезоната 2002 под името Фридрихсберг беше елиминирана во полуфиналето на Челнџ купот од битолски Пелистер.
- Без разлика како ќе заврши првиот натпревар во Скопје, мора да одиграме добро и во реваншот ако сакаме да се пласираме во следното коло. Иако противниците се последни на табелата во Данската лига, сепак тие не се слаба екипа, рече капитенот на „црвено-црните“ Борко Ристовски.
Во досегашната своја историја ракометарите на Вардар двапати играле во полуфиналето на ова натпреварување (1999 година против Адемар Леон и 2005 година против Загреб.
Натпреварот Вардар Про - ФИФ Копенхаген се игра в сабота од 18 часот во „СРЦ Кале“.