Ракометарите на македонскиот првак Металург вечерва од 18 часот имаат нов ривал во регионалната Сеха лига. Во Скопје, во салата „Автокоманда“, каде Металург ги игра натпреварите од оваа лига, гостува Црвена Звезда.
Македонскиот шампион во досегашните шест натпревари имаат пет победи и еден нерешен резултат со Нексе во Скопје.
- Мора во секој натпревар да влеземе без потценување бидејќи нема слаби ривали во оваа лига. Ако ја одиграме нашата игра мислам дека ќе немаме проблеми да постигнеме победа. Така ќе имаме и контрола над играта и резултатот. За нас е важно да ја победиме Црвена Звезда бидејќи веќе в недела играме со многу поквалитетен ривал екипата на Загреб, истакна крилниот играч Гоце Георгиевски пред денешниот дуел.
На чело на табелата во Сеха лигата е Загреб со 19 бодови (седум натпревари), пред Металург со 16 (од шест натпревари), истотолку има и Вардар Про (од осум натпревари). Денешниот противник на Металург Црвена Звезда е на 10-то место со три бодови (една победа и четири порази).