Во шест часот изутрината од Скопје за Белград отпатува возот со граѓаните добитници на билетите за превоз и за ракометниот натпревар Македонија - Србија што се игра во рамките на Европското првенство вечер во 20 часот.
Агенцијата за млади и спорт синоќа соопшти дека на добитниците ќе им биде поделен билет во два правци Скопје-Белград-Скопје, а по пристигнувањето во Белград на Централната железничка станица планирано за 16:30 часот ќе им биде врачена карта за натпреварот. Со картата може да се проследат сите натпревари.
Добитниците на билетите ќе имаат можност во белградска Арена најнапред во 18:15 часот да го проследат натпреварот Данска - Шведска, а потоа во 20 и 15 часот натпреварот Македонија - Србија.
Како што информираа од Агенцијата за млади и спорт, тргнувањето кон Централната железничка станица во Белград е предвидено во 22 и 15 часот, а возот за Скопје тргнува во 23 и 30 часот.
Од Агенцијата посочуваат дека се прават напори за организирано одење од Железничката станица до белградска Арена и назад.
Владата на Република Македонија обезбеди бесплатен железнички превоз за илјада македонски граѓани, додека билетите се набавени од страна на ГП „Пелистер“.