Македонската машка ракометна репрезентација следната година ќе биде дел од Светското првенство во ракомет кое од 11 до 27 јануари ќе се одржи во Шпанија. Во реванш натпреварот против Австрија кој се одигра во Виена, Македонија загуби со 27-30, но тоа не беше доволно Австријците да ја анулираат предноста од 5 гола разлика која ја освоивме на првиот натпревар во Скопје.
Најефикасен ракометар во нашите редови беше Кире Лазаров со 8 погодоци, а во репрезентацијата на Австрија тоа беше Роланд Шлингер со 7.
Покрај Македонија од европските баражи до сега пласман на СП 2013 обезбедија и репрезентациите на Русија, Словенија, Црна Гора и Унгарија.
Ова ќе биде трето учество на Македонија на СП по тоа во 1999 година во Египет и во 2009 година во Хрватска.