Македонскиот ракометен вицепрвак Металург во недела во СЦ „Борис Трајковски“ го игра натпреварот од 4.коло од Лигата на шампионите. Во Скопје доаѓа првакот на Белорусија Динамо Минск, тим кој по три кола има две победи на домашен терен (Вардар и Вакер Тун). Ист број на бодови четири има и Металург.
За неделниот противник тренерот на Металург, Лино Червар на денешната прес конференција изјави дека не смее да се повторат грешките од Барселона и треба да извлече поука од тој пораз.
-Динамо Минск има квалитетен состав, со две „тројки“ на бековската линија и со опасни крила, кои мораме да ги запреме и да внимаваме на нивната транцизија. Имаат истотака и квалитетен голман. Во секој случај тоа е состав , каде во стартните седум, шест им се странци, истакна Червар.
Репрезентативното крило на Македонија, Дејан Манасков поради повредата ги пропушти ланските два натпревара од осминафиналето, кои Металург ги доби (26:23 во Минск и 24:22 во Скопје).
- Ова е важен дуел за нас во овој дел од сезоната. Динамо не е истиот состав, кој лани ни беше противник. Мислам дека тие имаат проблем со воиграноста. Во секој случај особено ние крилата ќе треба да внимаваме на нивните крила и да не им дозволиме да даваат голови. Се ќе се решава во одбраната и се надевам на наша победа, рече Манасков.
Гостите од Белорусија во сабота со чартер ќе допатуваат во Скопје. Истиот ден ќе тренираат во СЦ „Борис Трајковски“, а во недела на денот на натпреварот ќе имаат тренинг во салата „Автокоманда“.